MIMAROPAဒေသရှိ စိုက်ပျိုးရေးဌာနသည် ကြက်သွန်နီစိုက်ပျိုးထုတ်လုပ်သောဒေသဖြစ်သည့် Oriental Mindoroတွင် ရိတ်သိမ်းပြီးနောက်အလေအလွင့်ဆုံးရှုံးမှုလျှော့ချစေရန်နှင့် လယ်ယာကဏ္ဍ ဝင်ငွေတိုးတက်စေရန်ရည်ရွယ်၍ ပီဆို ၄၀.၇ သန်း (အမေရိကန်ဒေါ်လာ ၀.၇၁ သန်း) တန်ဖိုးရှိသော ကြက်သွန်နီသိုလှောင်ရုံအအေးခန်းတစ်ခုကို ဖွင့်လှစ်ခဲ့ပါသည်။

အဆိုပါသိုလှောင်ရုံသည် Bulalacao၊ Barangay Campaasan တွင်တည်ရှိပြီး ဒေသခံ စိုက်ပျိုးသူများ အတွက် အခြေခံအဆောက်အအုံများကို ထိန်းသိမ်းခြင်းနှင့် စီမံခန့်ခွဲမည့် Bulalacao Development Cooperative (BUDECO) သို့ လွှဲပြောင်းပေးအပ်ခဲ့ပါသည်။

တန်ဖိုးမြင့်သီးနှံများ ဖွံ့ဖြိုးတိုးတက်ရေးအစီအစဉ်အောက်ရှိ ရန်ပုံငွေထောက်ပံ့ထားသော သိုလှောင်ရုံတွင် ကြက်သွန်နီမက်ထရစ်တန်ချိန် ၅၄၀ ခန့်နှင့် ညီမျှသောအိတ်ပေါင်း ၂၀,၀၀၀ အထိ သိုလှောင်နိုင်ပါသည်။

စိုက်ပျိုးရေးဌာန၏ အဆိုအရ ဤသိုလှောင်ရုံသည် ရိတ်သိမ်းမှုအများဆုံး အချိန်အတွင်း ပျက်စီး ဆုံးရှုံးမှုကိုလျှော့ချရန်နှင့် ဈေးကွက်အတွင်း ဈေးနှုန်းများမတက်မချင်း သီးနှံများကို သိုလှောင် နိုင်စေရန် ရည်ရွယ်ပါသည်။

အဆိုပါ လွှဲပြောင်းမှုကို ထောက်ပံ့ပို့ဆောင်ရေးဆိုင်ရာ လက်ထောက်အတွင်းရေးမှူး Daniel Alfonso Atayde က ဦးဆောင်ခဲ့ပြီး ဒေသဆိုင်ရာနည်းပညာဒါရိုက်တာ Emerson Yago လည်း တက်ရောက်ခဲ့ပါသည်။

BUDECO မန်နေဂျာ Danny Festin နှင့် ဥက္ကဋ္ဌ Dioner Escarez တို့က အဆိုပါသိုလှောင်ရုံကို လက်ခံရယူခဲ့ကြပါသည်။

ဤစီမံကိန်းသည် ဒေသတွင်း စိုက်ပျိုးရေးဆိုင်ရာအထောက်အပံ့များကို အားကောင်းစေရန် ကြိုးပမ်းမှုများ၏ တစ်စိတ်တစ်ပိုင်းဖြစ်ပြီး အချိန်နှင့် ဈေးနှုန်းပြောင်းလဲမှုအပေါ်တွင် မူတည်၍ ထိခိုက်လွယ်သော သီးနှံများကို ရည်ရွယ်ပါသည်။

ရိတ်သိမ်းချိန်လွန်နည်းပညာများ တိုးတက်ကောင်းမွန်လာခြင်းသည် လယ်ယာကဏ္ဍဝင်ငွေတည် ငြိမ်စေရန်နှင့် ဟင်းသီးဟင်းရွက် စိုက်ပျိုးထုတ်လုပ်သည့် ဒေသများတွင် ရည်ရွယ်ကြောင်း စိုက်ပျိုးရေးဌာနက ဖော်ပြခဲ့ပါသည်။

သိုလှောင်ရုံ လည်ပတ်နေခြင်းဖြင့် Bulalacao ရှိ လယ်သမားများသည် ရောင်းချချိန်ကို ပိုမို ပြောင်းလွယ်ပြင်လွယ်ရှိလာပြီး ရိတ်သိမ်းပြီးသည်နှင့် ချက်ချင်းရောင်းချရသည့် အခြေအနေကို လျှော့ချနိုင်မည်ဟု မျှော်လင့်ရကြောင်း (၄-၅-၂၀၂၆)ရက်နေ့တွင် ထုတ်ပြန်ခဲ့သော Fresh Plaza website ၏ သတင်းအရ သိရှိရပါသည်။

Source https://www.freshplaza.com/asia/article/9834741/philippines-opens-us-0-71-million-onion-cold-storage-in-mindoro/

တင်ပြသူ ဒေါ်ဟေမာန်အောင်မင်း၊ လ/ထဦးစီးမှူး ၊စိုက်ပျိုးရေးဦးစီးဌာန

ရက်စွဲ ၂၀၂၆ ခုနှစ်၊ မေလ (၁၀) ရက်

စစ်ဆေးသူ ဒေါ်စန္ဒီဝင်း၊ ဦးစီးအရာရှိ၊ စိုက်ပျိုးရေးဦးစီးဌာန

တည်းဖြတ်သူ ဒေါက်တာမျိုးမျိုးကြည်၊ ဒုတိယညွှန်ကြားရေးမှူး၊ စိုက်ပျိုးရေးဦးစီးဌာန