အီလက်ထရွန်းနစ်ပစ္စည်းများနှင့်အတူ စပါး၊ ကော်ဖီ၊ လက်ဖက်၊ ငရုတ်ကောင်း၊ ငရုတ်၊ နဂါးမောက်သီးနှင့် ပြုပြင်ထုတ်ပိုးထားသည့် ထုတ်ကုန်များကဲ့သို့သော စိုက်ပျိုးရေးထွက်ကုန်များသည် တရုတ်နိုင်ငံ Guangdong သို့ အဓိကတင်ပို့သည့် ဗီယက်နမ်နိုင်ငံ၏ ပို့ကုန်ပစ္စည်းများ ဖြစ်ကြသည်။

တရုတ်နိုင်ငံသည် (၂၀၂၃)ခုနှစ်အတွင်း ဗီယက်နမ်နိုင်ငံ၏ အကြီးဆုံး စိုက်ပျိုးရေးပို့ကုန် ဈေးကွက်ဖြစ်ကြောင်း စိုက်ပျိုးရေးနှင့် ကျေးလက်ဒေသဖွံ့ဖြိုးတိုးတက်ရေး ဝန်ကြီးဌာနအောက်ရှိ စိုက်ပျိုးရေးကုန်သွယ်မှုမြှင့်တင်ရေးဗဟိုဌာန (AgriTrade) ၏ ညွှန်ကြားရေးမှူးဖြစ်သူ Nguyen Minh Tien က တရုတ်နိုင်ငံ Guangdong ၌ ဒီဇင်ဘာလ (၂၇)ရက်နေ့တွင် ကျင်းပပြုလုပ်ခဲ့သည့် ဗီယက်နမ် ကုန်သွယ်မှုမြှင့်တင်ရေးညီလာခံတွင် ပြောကြားခဲ့ပါသည်။

၂၀၂၃ ခုနှစ်၊ ပထမ (၁၁)လအတွင်း ဗီယက်နမ်နိုင်ငံသည် တရုတ်နိုင်ငံသို့ အမေရိကန် ဒေါ်လာ (၁၁.၅)ဘီလီယံခန့် တန်ဘိုးရှိသည့် စိုက်ပျိုးရေးထွက်ကုန်များကို တင်ပို့ခဲ့ပြီး ကာလတူ (၂၀၂၂)ခုနှစ်နှင့်နှိုင်းယှဉ်ပါက (၁၈%)ခန့်တိုးလာခဲ့ပြီး ဗီယက်နမ်နိုင်ငံ၏ စုစုပေါင်း စိုက်ပျိုးရေးပို့ကုန် တင်ပို့မှု၏ (၂၃.၂%)ခန့် ရှိပါသည်။

တရုတ်နိုင်ငံအကောက်ခွန်ဌာန၏ အထွေထွေအုပ်ချုပ်ရေး စာရင်းအင်းများအရ ဗီယက်နမ် နှင့် Guangdong အကြားရှိ ကုန်သွယ်မှုပမာဏသည် အမေရိကန်ဒေါ်လာ (၄၇)ဘီလီယံအထိ ရောက်ရှိခဲ့ပြီး ဗီယက်နမ်နိုင်ငံနှင့် တရုတ်နိုင်ငံအကြားရှိ စုစုပေါင်း သွင်းကုန်-ပို့ကုန်ပမာဏ၏ (၂၀.၁%)ခန့်ရှိကြောင်း သိရှိရပါသည်။ ဗီယက်နမ်နိုင်ငံ၏ ပို့ကုန်တင်ပို့မှု ပမာဏသည် အမေရိကန် ဒေါ်လာ (၂၂)ဘီလီယံခန့် ရောက်ရှိခဲ့ပြီး သွင်းကုန်တင်သွင်းမှုပမာဏမှာ အမေရိကန်ဒေါ်လာ (၂၅) ဘီလီယံခန့် ရှိပါသည်။

စိုက်ပျိုးရေးကုန်သွယ်မှုမြှင့်တင်ရေးဗဟိုဌာန (AgriTrade) နှင့် Guangdong သွင်းကုန်-ပို့ကုန်အဖွဲ့အစည်းအကြားရှိ လက်မှတ်ရေးထိုးထားသော ပူးပေါင်းဆောင်ရွက်မှုသဘောတူညီချက် အရ ဗီယက်နမ်နှင့် တရုတ်နိုင်ငံ၏ စီးပွားရေးလုပ်ငန်းများအတွက် ကုန်သွယ်မှုဆိုင်ရာ ချိတ်ဆက် ဆောင်ရွက်မှုအစီအစဉ်များကို နှစ်ဦးနှစ်ဖက် အတူတကွ ပူးပေါင်းဆောင်ရွက်သွားမည်ဟု မျှော်လင့် ပါသည်။ တရုတ်နိုင်ငံ၏ စိုက်ပျိုးရေးထွက်ကုန်များ၊ ပစ္စည်းများ၊ production lines၊  ပြုပြင်ထုတ်ပိုးသည့် ထုတ်ကုန်များကို ဗီယက်နမ်စီးပွားရေးလုပ်ငန်းများသို့ မိတ်ဆက်ပေး သွားမည်ဖြစ်ပါသည်။

Guangdong သွင်းကုန်-ပို့ကုန်အဖွဲ့အစည်းတွင် အဖွဲ့ဝင်စီးပွားရေးလုပ်ငန်းပေါင်း (၁၀၀၀) ကျော်ရှိပြီး သွင်းကုန်-ပို့ကုန်စီးပွားရေးလုပ်ငန်းများ ဆောင်ရွက်ရန် ပညာရပ်ပိုင်းဆိုင်ရာ ပလက်ဖောင်း တစ်ခု ပံ့ပိုးပေးထားကြောင်း ဗီယက်နမ်နိုင်ငံရှိ Guangdong သွင်းကုန်-ပို့ကုန် အဖွဲ့အစည်း၏ Chief Representative ဖြစ်သူ Chau Kelvin က ပြောကြားခဲ့ပါသည်။

ဗီယက်နမ်နိုင်ငံတွင် အဆိုပါအဖွဲ့အစည်းသည် AgriTrade နှင့် ဒေသဆိုင်ရာများနှင့် ပူးပေါင်း၍ ကုန်သွယ်မှုမြှင့်တင်ရေးလုပ်ငန်းစဉ်များတွင် အတူတကွ ပူးပေါင်းပါဝင်၍ ပြပွဲများနှင့် ကုန်သွယ်မှုမြှင့်တင်ရေးပွဲများကို စီစဉ်ဆောင်ရွက်ပေးလျက်ရှိပါသည်။

မကြာသေးမီကာလအတွင်း အဆိုပါအဖွဲ့အစည်းသည် ဗီယက်နမ်ဒေသဆိုင်ရာများနှင့် ပူးပေါင်း၍ ကုန်သွယ်မှုမြှင့်တင်ရေးကို တိုးချဲ့ဆောင်ရွက်သွားမည်ဖြစ်ပြီး ဗီယက်နမ်နိုင်ငံ၏ စိုက်ပျိုးရေး ထွက်ကုန်များကို တရုတ်ဈေးကွက်တွင် ပိုမိုရရှိနိုင်ရေး ကူညီဆောင်ရွက်သွားမည် ဖြစ်ကြောင်း Chau Kelvin က ပြောကြားခဲ့ပါသည်။

အဆိုပါပြပွဲများတွင် စီးပွားရေးလုပ်ငန်းရှင်များသည် မကြာမီ ကျင်းပပြုလုပ်မည့် ပြပွဲများနှင့် ပတ်သက်သည့် သတင်းအချက်အလက်များကို အပြန်အလှန် ဖလှယ်ခဲ့ကြပါသည်။ စီးပွားရေးလုပ်ငန်းရှင်များသည် တရုတ်နိုင်ငံသို့ စိုက်ပျိုးရေးထွက်ကုန်များ တင်ပို့ရာတွင် ဗီယက်နမ် ပို့ကုန်လုပ်ငန်းရှင်များ ကြုံတွေ့နေရသည့် ပြဿနာများကို ‌ကူညီဖြေရှင်းပေးရန်  အကောက်ခွန် ဆိုင်ရာ လုပ်ထုံးလုပ်နည်းများ၊ ထောက်ပံ့ပို့ဆောင်ရေးနှင့် အွန်လိုင်းကုန်သွယ်မှုဆိုင်ရာ ကိစ္စရပ် များကိုလည်း ဆွေးနွေးခဲ့ကြကြောင်း (၂၇-၁၂-၂၀၂၃) ရက်နေ့တွင် ထုတ်ပြန်ခဲ့သော https://en. vietnamplus.vn/ ၏ သတင်းအချက်အလက်များအရ သိရှိရပါသည်။

Source https://en.vietnamplus.vn/agricultural-products-key-part-of-vietnams -exports-to-guangdong/275476.vnp

တင်ပြသူ ဒေါ်နွေးနွေးအောင်၊ စိုက်ပျိုးရေးဦးစီးဌာန

ရက်စွဲ ၂၀၂၄ခုနှစ်၊ ဇန်နဝါရီလ (၃) ရက်

စစ်ဆေးသူ ဦးသောင်းထိန်၊ လ/ထညွှန်ကြားရေးမှူး၊ စိုက်ပျိုးရေးဦးစီးဌာန

တည်းဖြတ်သူ ဒေါ်ဌေးဌေးရီ၊ ဒု-ညွှန်ကြားရေးမှူး၊ စိုက်ပျိုးရေးဦးစီးဌာန