အပင်နှင် အပင်ထွက်ပစ္စည်းများအား ပြည်ပမှ တင်သွင်းလိုသည့် လုပ်ငန်းရှင်များ လုပ်ဆောင်ရမည့် လုပ်ငန်းစဉ်များ

တင်သွင်းခွင့်ပြုထားသော အပင်နှင့် အပင်ထွက်ပစ္စည်းများအတွက် တင်သွင်းခွင့် ထောက်ခံချက်လက်မှတ်ကိုလျှောက်ထားနိုင်သည်။စိုက်ပျိုးရေးဦးစီးဌာန၊သီးနှံကာကွယ်ရေးဌာနခွဲ၏ ကြော်ငြာသင်ပုန်းနှင့် Website: www.ppd.doa.gov.mmတွင် ကြည့်ရှုနိုင်ပါသည်။

တင်သွင်းခွင့်ထောက်ခံချက်လက်မှတ်အား အပင်နှင့် အပင်ထွက်ပစ္စည်းများတင်ပို့မည့် တစ်ဖက် နိုင်ငံ၏ပိုးမွှားကင်းရှင်းကြောင်းသက်သေခံလက်မှတ် ထုတ်ပေးသည့်ဌာနသို့ ပေးပို့ရမည်။

၁။စိုက်ပျိုးရေးဦးစီးဌာန၊ သီးနှံကာကွယ်ရေးဌာနခွဲ၏ သတ်မှတ်သည့် တင်သွင်းခွင့် ထောက်ခံချက်လက်မှတ်လျှောက်လွှာပုံစံတွင် ဖြည့်စွက်ဖော်ပြ၍ ငွေသွင်းချလံ(မူရင်း)နှင့် အတူ လျှောက်ထား ရမည်။

၂။တင်သွင်းသူကိုယ်တိုင် လျှောက်ထားခြင်းမဟုတ်ပါက ကုမ္ပဏီ Letter Headဖြင့် ကိုယ်စားလှယ်လွှဲစာ ပါရှိရမည်။

၃။ကုမ္ပဏီတစ်ခုလျှင် ကိုယ်စားလှယ်(၂)ဦး ဆောင်ရွက်ရန် စာရင်းသွင်းမှတ်ပုံတင် ထားရှိရမည်။

၄။ စိုက်ပျိုးရန်အတွက်ဖြစ်ပါက 

(က) ကြံ(သကြားထွက်သီးနှံဌာနခွဲမှ ထောက်ခံချက်)

(ခ) နှစ်ရှည်ပင် (နှစ်ရှည်သီးနှံဌာနခွဲမှ ထောက်ခံချက်)

(ဂ) မျိုးစေ့နှင့် အပင်(မျိုးစေ့ဌာနခွဲမှ ထောက်ခံချက်)

(ဃ) သစ်တောထွက်အပင် (သစ်တောဦးစီးဌာနမှ ထောက်ခံချက်)ပါရှိရမည်။

၅။ ယင်းအချက်များပြည့်စုံပါက လျှောက်လွှာစာရင်းသွင်း လက်ခံပေးမည်ဖြစ်ပါသည်။ (မပြည့်စုံပါက ဆက်လက်ဆောင်ရွက်၍ မရနိုင်ပါ။)

တင်သွင်းခွင့်ထောက်ခံချက်လက်မှတ်ထုတ်ယူရန်ကြာချိန်မှာလျှောက်လွှာစာရင်းသွင်းလက်ခံ ပြီးချိန်မှ (၃)ရက်(ရုံးပိတ်ရက်မပါ)ဖြစ်ပါသည်။  

တင်သွင်းခွင့်ထောက်ခံချက်လက်မှတ်တစ်စောင်အတွက်အခကြေးငွေမှာ ၃၀၀၀၀ ကျပ်ဖြစ်ပါသည်။

နယ်စပ်စစ်ဆေးရေးစခန်းများတွင်လည်းတင်သွင်းခွင့်ထောက်ခံချက်လက်မှတ်ရယူရန်လျှောက်ထားနိုင်ပါသည်။